Muntada da las valurs da hash

Per sclauder manipulaziuns tar l’e-voting vegnan publitgadas differentas valurs da hash. Tscherts elements pon las persunas cun dretg da votar controllar sezzas:
 

• Per esser segirs che Vus essas sin il portal dad e-voting uffizial, pudais Vus verifitgar la valur da hash dal certificat SSL. La valur da hash correcta da quest certificat è stampada sin Voss attest da votar. Sch’ella è identica cun la valur ch’il browser mussa, pudais Vus esser segirs che Vus essas sin la pagina-web correcta. In’instrucziun per la verificaziun chattais Vus qua.
• En il text da funtauna da la pagina-web dal portal dad e-voting èn inditgadas las valurs da hash da las datotecas JavaScript (p.ex. crypto/ov-api.min.js). Questas datotecas cuntegnan il code da funtauna dal portal dad e-voting che codifitgescha, tranter auter, las vuschs e transmetta ellas a l’urna electronica. Sche tut las valurs da hash correspundan en il text da funtauna a las valurs da hash publitgadas, vegn duvrà il code da funtauna correct en il browser. In’instrucziun per la verificaziun chattais Vus qua.

Era tar l’uschenumnà process «trusted build» e «deployment» da la software dad e-voting vegnan generadas valurs da hash. Quellas permettan als chantuns da controllar sch’els dovran la software correcta, nunmidada.

Plinavant generescha il sistem dad e-voting cun las valurs da hash signaturas da tut las operaziuns impurtantas dal protocol criptografic. Cun questas signaturas e cun autras cumprovas matematicas po la cumissiun electorala controllar, tar la decodaziun dal scrutini, sch’il resultat è correct.