Sin l’attest da votar ed en il portal dad e-voting èn differents codes che vegnan duvrads per la votaziun electronica. Qua sutvart vegn explitgà tge ch’els muntan. Sch’ils codes, las instrucziuns u autras indicaziuns sin l’attest da votar na correspundan betg a quels en il portal dad e-voting, valan las infurmaziuns en l’attest da votar. En uschè in cas As supplitgain nus da contactar subit Voss chantun resp. Vossa vischnanca. Vus chattais las indicaziuns da contact correspundentas sin Voss attest da votar.
Code d’inizialisaziun
Il code d’inizialisaziun (segnà cun in TRIANGUL) consista dad ina seria da cifras e bustabs ch’èn sin Voss attest da votar. Vus stuais endatar il code d’inizialisaziun e Voss factur d’autentificaziun supplementar (data da naschientscha resp. onn da naschientscha) sin la pagina iniziala dal portal per As identifitgar e cumenzar il process da votaziun.
Codes da verificaziun
Ils codes da verificaziun èn segnads cun in DIAMANT. Els permettan da far l’uschenumnada verifitgabladad individuala. Tar ils codes da verificaziun vai per ina seria da cifras che vegnan inditgadas sin il monitur en il pass 3 «Verifitgar e bittar en». Cumparegliai ils codes da verificaziun inditgads cun quels sin Voss attest da votar. Sch’ils codes da verificaziun inditgads correspundan a quels sin l’attest da votar, savais Vus che Vossa vusch è vegnida codifitgada e transmessa correctamain tenor Vossa selecziun.
Code da conferma
Il code da conferma è segnà cun in PENTAGON. Sch’ils codes da verificaziun inditgads en il pass 3 «Verifitgar e bittar en» èn corrects, stuais Vus endatar il code da conferma per metter Vossa vusch en l’urna electronica. Sche Vus n’endatais betg Voss code da conferma, na vegn Vossa vusch betg messa en l’urna electronica. En quest cas pudais Vus vinavant votar per correspundenza u a l’urna.
Code da finalisaziun
Il code da finalisaziun è segnà cun ina STAILA sin Voss attest da votar. Cun il code da finalisaziun pudais Vus verifitgar en il pass 4 «Vusch bittada en» sch’il process da votaziun è vegnì terminà cun success. Sch’il code da finalisaziun correspunda al code inditgà, è la procedura da votaziun u d’elecziun vegnida terminada cun success.
Dapli davart il tema
Intgins tips per dapli segirezza
Era las utilisadras ed ils utilisaders pon contribuir lur part a la segirezza cun resguardar intgins paucs cussegls ch’èn però impurtants.
Questa pagina-web dovra cookies per optimar Vossa experientscha sco utilisadra e utilisader. Cun restar sin la pagina-web acceptais Vus l’utilisaziun da cookies.