Pass 1
L’autoritad cumpetenta trametta per posta a las persunas cun dretg da votar lur attests da votar cun tut las indicaziuns necessarias per la votaziun electronica.
Sin l’attest da votar èn codes per la votaziun electronica. Ils codes èn persunalisads. Perquai vegni recumandà urgentamain da tractar a moda confidenziala l’attest da votar.
Pass 2
Las persunas cun dretg da votar che pon far diever da l’e-voting endateschan manualmain l’adressa-web dal portal dad e-voting da lur chantun en la lingia d’adressa dal browser. L’adressa-web sa cumpona adina uschia: ct.evoting.ch, «ct» stat per l’abreviaziun dal chantun correspundent. Las persunas cun dretg da votar prendan enconuschientscha da las disposiziuns legalas sin la plattafurma.
L’access al portal è pussaivel cun il computer, il tablet u il smartphone.
En ils parameters dal browser pon las persunas cun dretg da votar controllar l’impronta dal det dal certificat digital per esser segiras ch’ellas èn sin il portal dad e-voting uffizial da lur chantun. Uschia sclaudan ellas ch’ellas dattan lur vuschs sin ina pagina-web manipulada u falsifitgada. Per garantir ch’il code JavaScript fetschia las operaziuns planisadas e ch’el codifitgeschia correctamain la vusch èsi pussaivel da controllar sia integritad.
Las persunas cun dretg da votar èn supplitgadas d’activar il modus privat da lur browser. Quest modus blochescha tut ils programs supplementars che pudessan esser nuschaivels (uschenumnads add-ons).
Pass 3
Las persunas cun dretg da votar endateschan il code d’inizialisaziun, ch’è sin l’attest da votar, ed il factur d’autentificaziun supplementar. Tut tenor chantun è quai l’onn da naschientscha u la data da naschientscha. Uss cumenza il process.
Il code d’inizialisaziun è necessari per cumenzar il process da votaziun e d’elecziun.
L’endataziun da l’onn da naschientscha resp. da la data da naschientscha n’è betg da vesair sco caracteristica da segirezza ma sco obstachel per duvrar in attest da votar ester.
Pass 4
Uss pon las persunas cun dretg da votar votar u eleger. Cun laschar vids ils champs pon las persunas cun dretg da votar s’abstegnair da la vusch.
L’agid cler per l’utilisaziun dal portal dad e-voting impedescha sbagls formals che pon manar ad ina vusch nunvalaivla.
Pass 5
Suenter che l’utilisadra u l’utilisader ha selecziunà la resposta vegnan inditgads codes da verificaziun. Quels ston correspunder als codes da verificaziun sin l’attest da votar. Suenter che las persunas cun dretg da votar han controllà lur selecziun, ston els codifitgar il cedel da votar electronic. Suenter n’èsi betg pli pussaivel da midar la selecziun. La procedura po però vegnir interrutta e la vusch po vegnir dada sur in auter chanal (per correspundenza, persunalmain) damai che la vusch electronica n’è anc betg vegnida confermada.
Cun lur codes da verificaziun persunals pon las persunas cun dretg da votar esser segiras che lur vusch vegn codifitgada tenor lur selecziun e transmessa al sistem dad e-voting.
Grazia a l’uschenumnada verifitgabladad individuala han las persunas cun dretg da votar, tras la controlla dals codes, la conferma ch’il sistem dad e-voting ha survegnì lur vusch codifitgada tenor lur selecziun. Sch’ils codes da verificaziun inditgads na correspundan betg a quels sin l’attest da votar, ston las votantas e votants interrumper il process e s’annunziar tar lur chantun resp. lur vischnanca. Las indicaziuns da contact correspundentas èn sin l’attest da votar.
Pass 6
Sche tut ils codes da verificaziun sa cunfan, endateschan las persunas cun dretg da votar lur code da conferma, ch’è sin l’attest da votar. Uschia vegn la vusch dada a moda definitiva.
Cun endatar il code da conferma vegn la vusch dada a moda definitiva. Sche Vus n’endatais betg Voss code da conferma, na vegn Vossa vusch betg messa en l’urna electronica. En quest cas pudais Vus vinavant votar per correspundenza u persunalmain a l’urna.
Pass 7
Per controllar sche la vusch è vegnida dada a moda definitiva, vegn inditgà in code da finalisaziun che sto vegnir cumpareglià cun l’attest da votar. A partir dad ussa n’èsi betg pli pussaivel da votar per correspundenza u a l’urna. Il post responsabel en il chantun pertutgà dumbra tut las vuschs inoltradas sin via electronica. Ina cumissiun electorala controllescha che tut las vuschs inoltradas vegnan dumbradas senza vegnir midadas. Per far quai serva l’uschenumnada verifitgabladad universala dal sistem.
Cun il code da finalisaziun pon las persunas cun dretg da votar verifitgar sch’il process da votaziun è vegnì terminà cun success e sche l’urna electronica ha registrà correctamain lur vusch.
Il dretg federal pretenda ch’il process dad e-voting vegnia surveglià dad examinaturas ed examinaturs independents. Per quest scopo incaricheschan ils chantuns gremis che vegnan numnads qua cumissiun electorala. La cumissiun electorala controllescha ch’il scrutini vegn organisà correctamain e ch’ils resultats n’èn betg vegnids manipulads. Plinavant è ella conresponsabla per la codaziun, damai ch'ella generescha e administrescha ina part da la clav (pled-clav).
Sche la cronologia dal navigatur vegn stizzada n’èsi betg pussaivel da trair conclusiuns davart la votaziun.