La vusch vegn transmessa a moda codifitgada. En l’urna electronica è la vusch anonimisada. Uschia n’èsi betg pussaivel da trair conclusiuns davart persunas e il secret da votaziun resta garantì.
Grazia a l’uschenumnada codaziun end-to-end resta la vusch anonima a partir dal mument cura ch’ella vegn inoltrada sin l’apparat enfin ch’ella vegn dumbrada da las autoritads chantunalas.
Il secret da votaziun resta garantì durant l’entir process. La vusch na po betg vegnir attribuida ad ina tscherta persuna.
Era il sistem dad e-voting separa las indicaziuns da las persunas cun dretg da votar da las vuschs, uschia sco che las collavuraturas e collavuraturs dal local electoral rimnan a moda separata ils attests da votar ed ils cedels da votar. Quai vegn fatg subit suenter che la vusch codifitgada è vegnida dada. Uschia na vegnan las autoritads e l’administratur dal sistem betg a savair co ch’ina tscherta persuna ha votà e il secret da votaziun resta garantì.
Il chanal da votaziun electronica vegn serrà la sonda avant la dumengia da votaziun a las 12.