Tar la dumbraziun vegnan prendidas differentas mesiras da segirezza.
La repartiziun da las incumbensas sin plirs apparats e pliras persunas protegia a moda segira il sistem dad e-votig dad attatgas da tut gener. Las vuschs electronicas vegnan dumbradas sin apparats dal chantun che n’èn betg colliads cun l’internet.
Avant la decodaziun vegnan tut las vuschs codifitgadas maschadadas pliras giadas cun l’agid da proceduras criptograficas. Uschia vegnan separadas tut las colliaziuns da las vuschs cun ils attests da votar u autras infurmaziuns che pudessan star en connex cun la vusch inoltrada (p.ex. meds d’autentificaziun, successiun, adressa IP etc.).
Per avrir las vuschs codifitgadas dovran ins ina clav cun pliras parts. Las singulas parts èn repartidas sin pliras persunas. Ina persuna suletta n’ha mai access a las vuschs inoltradas sin via electronica.
Cun in med d’agid separà, l’uschenumnada software da verificaziun, po la cumissiun electorala scuvrir eventualas manipulaziuns da las vuschs dadas.
Il mument da la votaziun vegnan las vuschs transmessas a quatter cumponentas da controlla. Ils codes da verificaziun che vegnan inditgads correctamain èn la cumprova che tut las cumponentas da controlla han registrà la vusch uschia sco che Vus avais inoltrà ella. Sche almain ina cumponenta da controlla conserva correctamain la vusch enfin tar la dumbraziun, vegn la vusch dumbrada (decentralisaziun). Cun la software da verificaziun po la cumissiun electorala eruir sche vuschs n’èn betg vegnidas dumbradas e scuvrir eventualas manipulaziuns.
Plirs computers independents in da l’auter ch’èn equipads a moda differenta e protegids tras mesiras da segirtad spezialas. Las cumponentas da controlla garanteschan surtut la verifitgabladad cumpleta.
Suenter il scrutini maschaidan las cumponentas da controlla ina suenter l’autra las vuschs inoltradas cun l’agid da proceduras criptograficas spezialas. Tras quai mida la successiun ed era la codaziun da las vuschs. Uschia vegnan las infurmaziuns che pudessan vegnir messas en connex cun las persunas cun dretg da votar separadas anc dapli da las vuschs codifitgadas. A la fin maschaida in’ulteriura cumponenta da controlla, ch’il chantun administrescha senza connexiun a la rait, anc ina giada las vuschs. Qua decodescha la cumissiun electorala a moda definitiva las vuschs e qua vegnan quellas era dumbradas ensemen. Cun l’agid da la software da verificaziun po la cumissiun electorala eruir ils cas nua ch’ina cumponenta da controlla n’elavurescha betg correctamain las vuschs.
Las vuschs dad e-voting vegnan publitgadas ensemen cun las vuschs ch’èn vegnidas inoltradas per correspundenza e quellas messas en l’urna. Il resultat è sin maisa.
Ils resultats da l’e-voting e quels da la votaziun per correspundenza e da la votaziun persunala a l’urna vegnan publitgads sin la pagina-web da las elecziuns e votaziuns dal chantun correspundent.