Simplamain dapli segirezza: Era las utilisadras ed ils utilisaders pon contribuir lur part a la segirezza cun resguardar intgins paucs cussegls ch’èn però impurtants.
Mintga persuna cun dretg da votar po contribuir a moda activa a la segirezza dad e-voting. Las persunas cun dretg da votar vegnan supplitgadas da sa tegnair vi da las instrucziuns. Sch’ina persuna constatescha irregularitads tar la votaziun electronica, p.ex. tar la verificaziun da la vusch, sto ella interrumper il process d’elecziun e da votaziun e contactar il post cumpetent. Las coordinatas èn sin l’attest da votar che l’autoritad ha tramess per posta. L’observaziun da las instrucziuns reducescha sin in minimum il ristg dad in abus tras terzs.
Per garantir ina votaziun electronica segira vegni cusseglià a las persunas cun dretg da votar da resguardar surtut las suandantas recumandaziuns:
- Tractar cun premura l’attest da votar: Las persunas cun dretg da votar duain tractar cun premura l’attest da votar. Quel cuntegna ils codes individualisads ch’èn indispensabels per ina votaziun electronica segira. Tenor la cifra 8.9 da l’ordinaziun da la ChF davart la votaziun electronica (OVE) ston ils codes vegnir tractads a moda confidenziala enfin ch’il scrutini è terminà.
- Duvrar il browser senza add-ons: A las persunas cun dretg da votar vegni cusseglià dad inoltrar la vusch electronica en in modus dal browser che blochescha ils add-ons dal browser (standard). D’ina vart schlargian ils add-ons las funcziunalitads dals browsers. Da l’autra vart chaschunan els ristgs da segirezza ed èn uschia in terren fritgaivel per attatgas.
- Controllar las valurs da hash: Ils chantuns ed ils experts externs controlleschan sche la software utilisada correspunda al code da funtauna publitgà. Ils protocols cun las valurs da hash vegnan publitgads. Era las persunas cun dretg da votar pon controllar tschertas valurs da hash.
- Controllar il portal dad e-voting: A las persunas cun dretg da votar vegni cusseglià da controllar a l’entschatta da la votaziun electronica sch’ellas èn sin il portal dad e-voting uffizial. Quai pon ellas far cun verifitgar il simbol da clav per ina colliaziun segira e l’impronta dal det.
- Controllar ils codes: Ils codes per inoltrar la vusch èn ina caracteristica da segirezza impurtanta. Perquai èsi impurtant da controllar els. Sch’ils codes sin il monitur na correspundan betg a quels sin l’attest da votar, sto il process d’elecziun e da votaziun vegnir interrut ed il chantun cumpetent vegnir infurmà.
- Stizzar la cronologia dal browser: Sche la persuna cun dretg da votar vul esser segira ch’i n’è betg pussaivel da trair conclusiuns davart la votaziun sin ses apparat – computer, tablet u smartphone – vegni cusseglià da stizzar la cronologia dal browser suenter mintga votaziun.