24.06.2026
Cun la permissiun fundamentala po il chantun Lucerna introducir la votaziun ed elecziun electronica ad emprova per projects chantunals. Sco emprim vegn e-voting a star a disposiziun a las Svizras ed als Svizzers a l'exteriur. Pli tard vegn la purschida extendida pass per pass er sin tschertas vischnancas.
Ils 24 da zercladur 2026 ha il Cussegl federal dà al chantun Lucerna la permissiun fundamentala per introducir la votaziun ed elecziun electronica per projects chantunals. La permissiun vala per dus onns. A partir da la votaziun dal settember 2026 pon las Svizras ed ils Svizzers a l'exteriur dal chantun Lucerna vuschar er sin via electronica. Per questa votaziun survegnan els automaticamain il material da votar per tut ils chanals. A partir dal 2028 èsi planisà d'introducir e-voting er en tschertas vischnancas da pilot, per exempel en la citad da Lucerna.
La garanzia che la votaziun saja segira e fidada, ha emprima prioritad per il chantun. Cun il sistem da la Posta svizra metta il chantun a disposiziun ina soluziun cumprovada che ademplescha ils auts standards da segirezza da la Confederaziun.
La votaziun electronica porscha plirs avantatgs. Per exempel pon ins uschia votar independentamain dal lieu e dal temp ed impedir vuschs nunvalaivlas. Plinavant arrivan las vuschs da las Svizras e dals Svizzers a l'exteriur uschia a temp e per persunas cun impediments porta la votaziun electronica ina facilitaziun. Ultra da quai pon ils biros d'urna eruir ils resultats d'ina votaziun electronica en moda exacta e svelta e senza ina gronda lavur administrativa. Cun l'introducziun dad e-voting vesa la Regenza da Lucerna la schanza d'auzar la participaziun da la generaziun digitala a votaziuns.
Il manaschi d'emprova vegn evaluà fin l'onn 2029. Suenter decida il parlament chantunal davart la cuntinuaziun da l'introducziun ad emprova.