02.09.2026
Il Cussegl federal ha dà al chantun Neuchâtel la permissiun fundamentala da reintroducir per emprova il e-voting. A partir da la votaziun dals 29 da november 2026 dastgan votantas e votants registrads puspè votar sin via electronica, observond las cundiziuns generalas fixadas da la Confederaziun. Questa permissiun vala per ina durada da 2 onns.
En sia sesida dals 2 da settember 2026 ha il Cussegl federal concludì da dar al chantun Neuchâtel la permissiun fundamentala necessaria per far emprovas cun la votaziun electronica. Cun questa decisiun vegn il e-voting puspè cuntinuà suenter ina interrupziun da plirs onns. A partir da la votaziun dals 29 da november 2026 pon tut las persunas cun dretg da votar, ch'èn sa registradas ordavant, votar sin via electronica. Il e-voting cumplettescha las duas pussaivladads da votar existentas: la votaziun per correspundenza e la votaziun persunala a l'urna.
Rinforzament dal rom giuridic e tecnic
La permissiun fundamentala dal Cussegl federal vala per ina durada da 2 onns, q.v.d. fin a la votaziun dals 26 da november 2028. Sco ils auters chantuns cun ina permissiun fundamentala dovra er il chantun Neuchâtel in'admissiun specifica da la Chanzlia federala per mintga applicaziun dad e-voting.
Per las emprovas dad e-voting dovra il chantun Neuchâtel – sco ils auters chantuns – il sistem dad e-voting ch'è vegnì sviluppà da la Posta svizra. Per pussibilitar la reintroducziun da la votaziun electronica èn las basas giuridicas chantunalas vegnidas reelavuradas e messas en vigur per il 1. da zercladur 2026. La revisiun è stada necessaria per tegnair quint da las pretensiuns definidas en l'Ordinaziun da la Chanzlia federala davart la votaziun electronica (OVE) areguard la segirezza, la confidenza, la transparenza e la verificabilitad.
Ina nova pussaivladad per far diever dals dretgs politics
Il chantun Neuchâtel ha decidì da pussibilitar il e-voting a tut las votantas ed ils votants da Neuchâtel. Latiers tutgan er persunas estras cun ina permissiun da domicil (legitimaziun C) sco er Svizras e Svizzers a l'exteriur. Persunas che vulan votar sin via electronica ston sa registrar ordavant sur il spurtegl online «Guichet unique». Uschespert che la registraziun è confermada, survegnan ellas ils documents necessaris per duvrar quest chanal da votaziun per las proximas votaziuns ed elecziuns. Tgi che vul survegnir access al e-voting a partir da la votaziun dals 29 da november 2026, vegn supplitgà da far ils pass necessaris uschè svelt sco pussaivel, il pli tard dentant fin ils 16 d'october 2026. Var 17 500 persunas cun dretg da votar èn gia sa registradas per il e-voting.
Tut las infurmaziuns en connex cun il e-voting e las modalitads da registraziun chattais Vus online sut www.ne.ch/vote(colliaziun externa, s’avra en ina nova scheda).
A Neuchâtel ha innovaziun tradiziun
Dals onns 2005 fin 2019 è il chantun Neuchâtel stà il pionier da la votaziun electronica en Svizra. Ussa cuntinuescha il chantun puspè cun questa tradiziun, e quai en in rom giuridic e tecnic renovà dal tuttafatg, che correspunda a las pretensiuns actualas da la Confederaziun.
Questa reintroducziun correspunda a las finamiras dal program da legislatura 2026–2029 da la Regenza. La reintroducziun contribuescha a la transfurmaziun digitala dals servetschs administrativs ed al svilup da servetschs publics pli simpels, segirs ed accessibels e maina uschia las instituziuns pli datiers a la populaziun. Ella represchenta la voluntad da la Regenza da metter en il servetsch da la democrazia las pussaivladads che resultan da la digitalisaziun, e da facilitar l'execuziun dals dretgs politics.