03.03.2023
A sia sesida dals 3 da mars 2023 ha il Cussegl federal concedì la permissiun fundamentala per far puspè emprovas cun e-voting. A partir da las votaziuns dals 18 da zercladur 2023 pon Svizras e Svizzers en tut ils trais chantuns, persunas cun impediments en il chantun Basilea-Citad sco era persunas cun dretg da votar annunziadas da tschintg vischnancas da pilot en il chantun da Son Gagl puspè dar giu lur vusch sin via electronica. Suenter duain era autras vischnancas interessadas dal chantun da Son Gagl pudair prender part.
Dapi il fanadur dal 2019 n’era la votaziun electronica betg pli pussaivla en Svizra. Da lez temp era la Posta svizra sa retratga sco ultim purschider dal sistem. Dapi lura ha ella sviluppà in nov sistem per la votaziun electronica cun la verifitgabladad cumpleta. Il 2021 ha la Posta svizra publitgà il code da funtauna dal nov sistem. En differents pass han expertas ed experts independents verifitgà il sistem e la Posta ha sviluppà vinavant el. Era resuns da la publicitad e da spezialistas e spezialists che la Posta ha survegnì cun ses program «bug bounty» e cun il test d’intrusiun public ch’è vegnì fatg en quest rom han gidà a meglierar il sistem.
Uss ha il Cussegl federal autorisà ils trais chantuns da Son Gagl, Turgovia e Basilea-Citad da duvrar il nov sistem dad e-voting da la Posta en il manaschi d’emprova. Ils chantuns dastgan metter a disposiziun l’e-voting a maximalmain 30 pertschient da las persunas cun dretg da votar (electorat restrenschì). Ultra da quai vala la permissiun ina giada per dus onns, dals 18 da zercladur 2023 enfin ils 18 da matg 2025.
Las novas basas giuridicas per il manaschi d'emprova cun l’e-voting cun pretensiuns da segirezza e da qualitad pli severas e precisas envers il sistem e ses manaschi èn entradas en vigur il 1 da fanadur 2022. En il center dal manaschi d’emprova ch’è vegnì orientà da nov stat in process cuntinuant da verificaziun e da meglieraziun dal sistem e dal manaschi. Ils chantuns garanteschan che las pretensiuns da segirezza e las prescripziuns da transparenza vegnian respectadas. In catalog da mesiras concret documentescha il basegn d’agir ed il svilup ulteriur. La Confederaziun, ils chantuns participads e la Posta svizra garanteschan ensemen che las mesiras definidas vegnian realisadas. En quest connex vegnan resguardadas era las experientschas praticas cun l’e-voting a partir dals 18 da zercladur 2023. La stad dal 2022 èn ils process da manaschi dals trais chantuns gia vegnids verifitgads en in audit ch’era vegnì fatg per incumbensa da la Chanzlia federala. Els han survegnì bunas notas.