22.11.2023
En sia sesida dals 22 da november 2023 ha il Cussegl federal concedì al chantun Grischun la permissiun da basa per reprender las emprovas cun e-voting. A partir da l'onn 2024 pon las persunas cun dretg da votar da sis vischnancas da pilot dal Grischun dar giu lur vusch sin via electronica. Pli tard – probablamain l'onn 2025 – duain pudair sa participar er autras vischnancas grischunas interessadas.
Suenter ch'il manaschi d'emprova ha cumenzà cun success il zercladur da quest onn en ils chantuns Basilea-Citad, Son Gagl e Turgovia, è ussa er il chantun Grischun, sco quart chantun, pront per la votaziun electronica cun il sistem da la Posta svizra. A partir da la votaziun dals 3 da mars 2024 pon las persunas cun dretg da votar da las vischnancas da pilot da Domat, Lumnezia, Puntraschigna, Poschiavo e Val Stussavgia consegnar lur vusch per l'emprima giada sin via electronica. Landquart sco sisavla vischnanca da pilot suonda per motivs organisatorics e da termin in pau pli tard, a partir da la votaziun dals 9 da zercladur 2024.
Il chantun dastga metter a disposiziun e-voting per maximalmain 30 pertschient da las votantas e dals votants (electorat limità). Per entant vala la permissiun durant 2 onns, dals 3 da mars 2024 fin ils 8 da mars 2026. Il manaschi d'emprova duai permetter il diever dad e-voting per persunas cun dretg da votar interessadas, pussibilitar al chantun da far experientschas e promover ina meglieraziun cuntinuanta dal sistem. Da quai fa part ch'il chantun persequitescha stretgamain ils process ed als meglierescha cuntinuadamain en collavuraziun cun la Chanzlia federala e cun la Posta. Tut sa basa sin in catalog da mesiras da la Confederaziun e dals chantuns participads. En il chantun Grischun èn ils process da manaschi gia vegnids examinads durant la primavaira e la stad 2023 en il rom d'in audit incumbensà da la Chanzlia federala. Els han survegnì in bun attestat.
Votantas e votants grischuns che sa decidan per e-voting, ston s'annunziar ordavant sin via electronica. Tut las infurmaziuns davart la procedura d'annunzia sco er indicaziuns generalas davart il chanal da votaziun e-voting en il chantun Grischun stattan a disposiziun sin www.gr.ch/e-voting.