25.06.2025
Dapi la votaziun dal zercladur 2023 pon las votantas ed ils votants d'intgins chantuns puspè votar sin via electronica. Il Cussegl federal ha permess da reprender il e-voting sin fundament da novas basas giuridicas cun pretensiuns da segirezza pli grondas envers il sistem ed envers il manaschi. Applitgà vegn il nov sistem da la Posta svizra. Quest sistem permetta da verifitgar cumplettamain las votaziuns e las elecziuns electronicas. Il manaschi d'emprova è plinavant suttamess ad in process da controlla e da meglieraziun cuntinuà. Quai garanteschan la Confederaziun, ils chantuns participads e la Posta Svizra cun lur stretga collavuraziun, che cumpiglia er la participaziun da la scienza.
La segirezza è pli impurtanta ch'il tempo
En connex cun il e-voting vul il Cussegl federal extender il manaschi d'emprova pass per pass. Ed ils chantuns duain decider sezs, sche e cura ch'els vulan porscher e-voting. Els dastgan admetter maximalmain 30 pertschient da lur electorat a la votaziun electronica. Per l'entira Svizra importa la limita 10 pertschient. A l'emprima votaziun dapi che las emprovas èn vegnidas reprendidas ils 18 da zercladur 2023, han var 65 000 persunas dals chantuns Basilea-Citad, Son Gagl e Turgovia gì la pussaivladad da dar giu lur vusch sin via electronica. Il dretg da votar sin via electronica han gì las Svizras ed ils Svizzers a l'exteriur, las persunas cun dretg da votar da tschintg vischnancas dal chantun Son Gagl sco er persunas cun impediments en il chantun Basilea-Citad.
Durant ils ultims dus onns è il e-voting vegnì extendì pass per pass. En il chantun Son Gagl sa participeschan en il fratemp 66 vischnancas al manaschi d'emprova. Il chantun Grischun ha introducì l'onn 2024 las emprovas cun la votaziun electronica en sis vischnancas – inclusiv las Svizras ed ils Svizzers a l'exteriur ch'èn annunziads là. Actualmain èn 17 vischnancas grischunas participadas al manaschi d'emprova dad e-voting. La Confederaziun ed ils chantuns tiran ina bilantscha positiva. Tut las votaziuns ed elecziuns electronicas – tranter auter er las elecziuns dal Cussegl naziunal e dal Cussegl dals chantuns 2023 sco er elecziuns chantunalas – èn vegnidas realisadas cun success. Il dumber da vuschs consegnadas sin via electronica s'augmenta cuntinuadamain (datas detagliadas davart l'applicaziun da la votaziun electronica sut Versuche mit E-Voting). En sia sesida dals 25 da zercladur 2025 ha il Cussegl federal renovà la permissiun fundamentala dals chantuns Basilea-Citad, Grischun, Son Gagl e Turgovia per realisar ulteriuras votaziuns cun e-voting. A la votaziun dals 28 da settember han var 159 500 persunas cun dretg da votar la pussaivladad da vuschar sin via electronica.
Er vinavant ha la segirezza l'emprima prioritad en connex cun il e-voting. Il sistem vegn examinà cuntinuadamain: per l'ina per incumbensa da la Confederaziun tras expertas ed experts independents, per l'autra sin invitaziun da la Posta tras spezialistas e spezialists da criptografia interessads e tras uschenumnadas hackeras e hackers etics. Per dar in stimul prevesa la Posta remuneraziuns per confermas da flaivlezzas – tut tenor il grad da grevezza d'ina flaivlezza pon quai esser fin 250 000 francs. Fin ussa ha la Posta survegnì circa 400 annunzias, tranter quellas n'eran naginas constataziuns criticas. Per tut las constataziuns confermadas ha ella pajà remuneraziuns da tut en tut 220 000 francs. Sin basa da las annunzias e da las controllas per incumbensa da la Confederaziun ha la Posta sviluppà vinavant e meglierà cuntinuadamain il sistem. Ultra da quai fa ella tests publics d'intrusiun, nua che hackeras e hackers etics attatgan il sistem. Quest test ha sveglià l'interess internaziunal ils onns passads. A nagin n'èsi gartegià d'entrar en il sistem. Er questa stad envida la Posta d'attatgar il sistem dad e-voting.
Las experientschas dals ultims dus onns vegnan resguardadas per l'ulteriur manaschi. Da la finamira declerada da la nova orientaziun, numnadamain da stgaffir transparenza cumplaina, vegni medemamain tegnì quint: Tut las cumponentas dal sistem sco er la documentaziun appartegnenta èn reveladas. La Chanzlia federala publitgescha ils rapports da controlla da las expertas e dals experts independents sin sia pagina d'internet, ed il basegn d'agir constatà sco er ils ulteriurs svilups planisads vegnan documentads en in catalog da mesiras.
Ulteriura extensiun dal manaschi d'emprova
Las cundiziuns severas sco er il svilup cuntinuà e la controlla èn sa cumprovads. Anc quest onn vegnan ils chantuns Son Gagl e Grischun ad extender il e-voting sin ulteriuras vischnancas. Plinavant duai il e-voting star a disposiziun en ina fasa da pilot en tschintg fin set vischnancas dal chantun Turgovia sco emprim a persunas cun dretg da votar che vivan en Svizra, e quai previsiblamain a partir da la votaziun dal mars 2026. Proximamain vulan er ils chantuns Lucerna e Genevra porscher emprovas cun e-voting. Sco tar l'introducziun da la votaziun per correspundenza creschan la confidenza e l'utilisaziun cun il temp. Betg mo las Svizras ed ils Svizzers a l'exteriur apprezieschan la pussaivladad da votar independentamain dal lieu e dal temp – er adina dapli persunas cun dretg da votar che vivan en Svizra, tschernan quest chanal da votaziun segir e controllabel.